آپئے ورگ په کیمت جان اِنت
نبیسۆک: ھمیدا شستان
اے بے آپئے کسه پهکێن بلۆچ راج آماچ انت هاسکار بلۆچئے چُک اے بێدروێن زندئے گێشتر آماچ انت. بلۆچستان چه اے دگه جاهان پدمنتگ‌تر انت. انچێن جاه هست انت که بلۆچ مردما په ورگی شۆدگی آپئے دسترسی نێست. هر رۆچ مزنێن مردم هۆر گۆن وتی کسانێن چُکان چنت میل په پاد پیاده وتا په ورگ آپێا رسێننت، آ آپ هم په ورگا لاێک نه‌انت. اےدوێن چکانی کسه و داستان چه دنیایئے هما جاها گوشگ بئیگا انت که آ جاهئے نام انت بلۆچستان
ادا بلۆچستان اِنت وبلۆچستانئے بازێن دمگانی هلک ومێتگ لۆله کشی نه‌اِنت ومردم په وتی ورگی و شۆدگی آپا بایدانت گۆن گئلن آپ په سر بکشنت. هۆتگ یک مزنێن کَلّے که او٘دا آپ سر‌جمَ بیت.
درستێن سَهدارائے زند, په آپئے ورگا بندیگ انت گانڈو یا آپی گۆج یکے چه هما سَهدارانت که ھۆتگانی تۆکا انت و بازی٘ن بلۆچئے چُک په آپئے آرگا و گُدئے و جانئے شۆدگا گانڈوانی کُربانی بوتگ و هست انت.
اے رۆچ انچش آ دگه رۆچانی پئیما گرم ات و مهتاپ ومهنائے مات آیانَ په آپئے ارگا دێم په هۆتگا رئوان کرت.مهتاپ و مهنائے واهگ همش ات که زوت چه هۆتگا آپ بیارَنت و گۆن وتی گوازییا مشکؤل ببنت بله آ رۆچ انچش گوستگێن رۆچانی پئیما نه‌ات. مهتاب و مهنا دو گئلن زرت و گَل و آواز وانان دێم په هۆتگا په اِشتاپیا شتنت. وهدے آیان هۆتگئے کرّا رستنت آیانی گُد چه هێدا میچلّ بوتگ اتنت.
آیان وتی پێشانیگئے هی٘د گۆن وتی سریگان پهک کرتنت و گئلنش ھۆتگئے تۆکا بُکّ داتنت و وداراش کرت ،بله گئلنش زوت پر بوتنت. البت مهنا که کسترێ٘ن گهارات و آییئے کَدّ و بالاد کسترات و آ په آپئے آرگا مجبورات که جَهلتر و نزّیکتر برئوت. وهدے که مهنا گئلنا آپئے تۆکا کرت آییئے مارشت همش ات که تێزێن چیزی انچش تلکے آییئے دستا شکار کرت و آپئے رنگ سُهر بوت و گئلن چه آییئے دستا وئیل بوت و تهارێن آپئے تۆکا گار بوت.
مهنا کوکاری جت و چه دستئے دردا آییئے ارس رئوان گپتنت. مهتاپ وتی گئلنا یله دات ومهنائے پُشتا اۆشتات و گۆن تمامێن زۆرمهنایا وتی دێما کشّت. گانڈو پرزۆرات و آییئے دَنتان انچش مهکمێن تلکئے پئیما مهنائے دست کُبل کرتگ ات بله مهتاپ کوشست کرت که وتی گهارائے دست چه گانڈوئے دپا دربکنت.
مهتاب گۆن بازێن زۆرائے جَنگ و جهدئے کنگ توانتی وتی گهارائے دستا چه گانڈوائے دپا بکشّیت. مهتاپ وتی گهارا امبازان گپت و تان آییئے پادا تئوان هست ات اشتاپ کنان چه هۆتگا دور بوت و دێم په لۆگا جست. گانڈو انگت آییئے پدا جِست بله مهتاپئے پادانے کُدرت و تێزی چه گانڈو باز گی٘شترات و گانڈو دم برت و دێم په هۆٹگا پِرّ ترّت.
هۆن چه مهنائے دست ترینزَان ات و مهنا بێسار بئیان‌ات. مهتاپ اۆشتات و مهنای زمینئے سرا نادێنت و آییئے دستا گۆن وتی سریگا بست. مهنائے دستئے هۆن آیگ کمتر بوت و مهتاپ دوارگ وتی گهاری امبازان گپت و دێم په لۆگا اشتاپی رئوان بوت. آییئے واک کُتّت ات و آییئے پاد چه بازێن جِهگان بے حسّ اتنت.
گُڈسرا آ وتی لۆگا سربوت اے وهدی هی٘سک و همپان,چه ڈننا وتی ماتی تئوار جت. آییئے ماتا وهدے مهنائے هۆنێن دست دیست مهنای امبازان کرت کوکاری جت و هلکئے مردم په کمک و دزّبۆجی لۆٹاێنتنت. مردم په دزّبۆجی آتکنت و مهنائے ماشینئے تۆکا کرت. مهتاپ و ماتا هم ماشینا سئوار بوت و دی٘م په بیمارستانا رهادگ بوتنت. آیانی مێتگ چه بیمارستانا باز دور ات.
چُنت ساهتئے رندا آیان بیمارستانا سر بوتنت و مهنا چُنت ساهت په دستئے اپریشنا بێسارات. مهتاپ و آییئے ماتا چه پرێشانیا نزانتش چۆن بکننت. چُنت ساهتئے رند دکتر آتک و گوشتی که آیان نتوانتش که مهنائے دستا نجات بدئینت بله مهنا زندگ انت و په ساربئیگئے رندا آیانی جستا گپتگ.
مهنائے دست پێسریگێن دست نبوت و رند چه بازێن آپرێشن و زرّائے دئیگ و دکترائے مُلاکاتا مهنایا مئسنویی دستی رسِت بله مئسنویی دست هچ وهد انچش ابرمێن دست نبوت.
اے کس٘ه په سر نرستگ پمێشکا انگت رۆنندۆکے بلۆچستانئے هلک ومێتگ بے آپ و لوله کشی انت. بازێن بلۆچئے دردانگێن چکّ انچش مهنا گانڈوانی کُربانیگ بوتگ و بئیگا انت. بازێن چکّ هۆٹگا و آپئے تۆکا گَرک و بێران بوتگ و بئیگا انت.
اێرانئے هاکم و دئولت په بلۆچئے درد و گم وچکّانی دێمرئوی و سهولتا بها ندنت. انون جست اشنت که بلۆچئے مردم چۆن بکننت که وتی چکانا چه بے آپی و هۆٹگئے آپ آرگ و آپئے گَرک بئیگ و گانڈوانی اُرُش کنگا نجات بدنت ؟
