شۆنگال
لهتێن شماری رپورتانی رِدا بلۆچستان و سیستانئے استانا بێسجلێن مردم کمّ و گێش یکسد هزار نپر اَنت که چه اشان هشتاد هزار کۆدک اَنت. اے مُهمّێن بُنگپّے که باید اِنت اشیئے نێمگا دلگۆش گوَر کنگ ببیت.اے دمگئے مردم زبهر و نێزگار اَنت، پمێشکا په پێدایشی گواهیئے کاگدئے گرگا سپر کرتَ نکننت. په یک مردمے که نێزگار اِنت و کلّگێا زندَ گوازێنیت زاهدانا سپر کنگ و دی ان ائیئے رپورتئے گرگ سکّ گرانێن کارے. مردمے که چه شهرا دور و گستاه زندَ گوازێننت، آیان هچ وسیله و امکانے نێست که چه سرکاری هزمتا بهروند ببنت و په وتی چکّان رند چه آیانی پێدایشا چه هندی کپتۆکجاهان پیدایشی گواهیئے کاگدا بگرنت. مدّتێا رند چه اشان لۆٹگَ بیت که دی ان ائیئے تستا بدئینت تانکه پکّا ببیت که آ کۆدک بیولوجیکی هسابا آیانی چکّ اَنت. اے تست اێوکا اُستانئے بنجاهی شهرا بیت. تستئے هرچ و درچ هم باز اِنت و اُستانئے بنجاهی شهرئے دراجێن سپر هم اے کارا په آیان گرانترَ کنت.
بے سجلا مردم مداما چه وتی بنیاتیێن هکّ و اۆبالان زبهرَ بنت. آ بے بیمَها چه درمانی هزمتان بهروندَ نبنت، وتی چکّان وانگجاهان راه داتَ نکننت و الکاپێن کار و رۆزگارے هم نرسیتش. اے بابتا جنێن و کسانێن چکّان گێشترێن. تاوانَ رسیت..
اێرانئے اسلامی جمهوری هچبر بێسجلێن مردمانی پکّاێن شمارا نگوَشیت و آییئے کۆشست همش اِنت که اے شمشتگێن جهمنندانی اسلیگێن شمارا مگوَشیت و کمترێن شمارے اێلان بکنت. مان اێرانا اے بێپجّارێن بلۆچ مردم چه هما کمّکێن مۆه و سرکارئے اُلسی هزمتا هم که آ دگه جهمنند چه آیان بهروند اَنت زبهرَ بنت.
