دراجێن وهدێا اێرانئے نام گۆن پِرشیایا همدپ بوتگ. په بژن ، اے ردپهمی بوتگ و انگت هم برجاه اِنت که دْرستێن اێرانئے نندۆک پارس اَنت و پارسی زبانئے هبرکنۆک اَنت .بله گْواچنی چه هشتاد و دوێن ملیون اێرانئے باشندهان نێما گێش دگه زبانێا گالوارَ کنگا اَنت .بله بس پارسی زبان اِنت که اێرانئے دربرجاهان وانێنگ بئیگا اِنت. اێرانئے مردم ابێدِ پارسیا آ دگه زبانان چۆ که بلۆچی، اربی، کردی، ترکی ،گیلکی و لُری هبرَ کننت.
اے هما زبان اَنت که ماتی زبان گْوشگَ بنت، هما که بندش جنگ بوتگ‌اَنت، بس لۆگا هبر کنگَ بنت و جاهے په آیانی ردۆم و دێمرئویا نێست. چۆ که اے مُلکا بس یک سرکاری زبانے هست‌اِنت، آ دگه زبانان پارسی زبانئے کدّا کدر و کیمّت نێست و ڈالچار کنگ بوتگ‌اَنت. اسلا نه تهنا اے زبان، بلکێن هر مردمے که اے زبانانی گْوشنده اَنت ڈالچار کنگ بوتگ‌اَنت.
هما نۆدربر که آیانی ماتی زبان پارسی نه‌اِنت چتئورَ بنت؟ آ اێرانئے تالیمی رهبندا گۆن چه جنجالێا دێم‌په‌دێمَ بئینت؟ چێری تامُرا که ماتی زبان مان اێرانئے بارئوا اِنت لهتے جنجال و گڑ و منج که اے چکّانی دێما اَنت پێش دارگ بوتگ‌اَنت.
همے ڈئولا اے تامر اے گپّا پدّرَ کنت که گۆن سرکاری زبانئے همراهیا دگه زبانێا هبر کنگئے واک چینچُکێن ارزشتے داریت .واکے که اێرانا په بژن بیهارے لێکگَ بیت و اڑاند کنگَ بیت. اێرانا هر سال دربرجاهئے ائولی رۆچا استمانی ٹۆلی اے داوایا درشانَ کننت که مئے چکّانا اے هکّ هست‌اِنت که په وتی ماتی زبانا وانێنگ ببنت .
