نبشتاکار: منیر مۆمن
انگریزی رجانک: فضل بلۆچ
رۆچۓ ائولی برانزا مێزَر و دیدارۓ گردنانی نیاما وتی کِشک شۆهازِت و دوێن پَچ لَرزِتنت. وتی کِرّ و گوَرا شَرّیا چارگا لگِّتنت. دوێن جێڑگا اَتنت که ما دۆشیگێن تئوامێن شپ همے وڑ گوازێنتگ.
مێزَر و دیدار زی بێگاها چه وتی هنکێنا لِکّتنت و اِشانا همدا شپا گِپت. گڑا دوێنان جێڑِت که شپا همے جُمپۓ سرا گوازێنێن. اے یَکّ وڈّے اَت. بسّ لهتێن انچێن هاکی جُمپ اَتنت و دور دورا دگه هچّ نێست اَت. مێزَرا جێڑِت: "بهِشت بگندۓ همے وڑا ببیت،" و پدا وتی سری بانزُلانی چێرا چێر دات.
اے یَکّ کوَهنێن گِلی کَمپانے. اِشیۓ تها هما کَلات که بوتگ، آ نون ڈُڑِتگ و کَپتگ، بله آییۓ نِشان انت گِلۓ جُمپانی درۆشُما باز جاگها هَست اِنت. انچۆ سَما بیت که اے یَکّ زمانگے اے هندۓ هاکمانی جاگه بوتگ، بله وهدۓ بدَلیان اے کَمپان و کَلاتۓ واهُند بدَل کنان کَرتگ اَنت. انّون اے جاگه بَشّام زَر گِرئیگ اِنت.
بَشّام سێر و اَزگارێن مردے. اکَمپانۓ تها شئوک و نۆکێن لۆگی جۆڑ کُرتگ و کَلاتۓ بَسّ گُڈسری نِشانی پَشت کَپتگ اَنت. بله کَمپانی انگت نسُرێنتگ و اے هما وڑامُهر و مُهکم اِنت. کَمپانۓ تها، رۆدَراتکی پهناتا جَمۓمزَنێن درَچک اَنت که اِشانی اُمرۓ کساس جَنگَ نبیت. سکّێن کوَهنێن درَچک پیرتِر اَنت؟ بشّام زَرگِرۓ کمپانۓ زِرباری رۆدَراتکا مِستری سبزَلۓ لۆگ اِنت. مِستری سبزَلۓ لۆگ هم کَسان نه اِنت بله بشّام زَرگِرۓ کَمپانۓ چارِک هم نبیت.
مستری سبزَلۓ کَمپانۓ تها چار بان مان و یکّ سِمِٹّ و بُلاکۓ مزنێن ڈَبّے هم هست که آییۓ تها کُرۆس، نِکێنک، کپۆدَر، شانتُل ، مٹّو، کپینجر و اے دگه کَسان کَسانێن بازێن مُرگے هَست. سبزَلۓ مستِرێن چُکّ رَمزان مُرگۓ سکّێن شئوکیۓ و تئوامێن رۆچا گۆن وتی مُرگان مشکول اِنت.
راستێن نێمگے جَمۓ سَرا چیپّانۓ هَنکێن اِنت. آییۓ دو چُکّ اَنت، شێپَلُک و مێزَر. چیپّان کَپۆدَرے که دێر انت اے جَمی وتی هَنکێن کُرتگ. آ چه کَسانیا همدا آتکگ و رندا شێپلُک و مێزَرۓ پِتی دُچار کَپتگ. گُڑّا همدا بوتگ اَنت.
بله چیزّے ماه پێسر شێپلُک و مێزَرأ پِت یَکّ رۆچے که چه اِدا دَر آتک، گُڑّا پدا واتر نبوت. هُدا بزانت چۆنێن وئیلے سرایی کَپتگ. بله اینچک وهد گوَزگا رند نون اے مات و چُکّ اێکیّم بوتنت که آ هئیات نه اِنت.
مِستری سبزَلۓ لۆگۓ مُرگانی تها بازێن کپۆدرے هم هست. سبزَلۓ چُکّ اِشان په وهد و پاس ڈَنّا کَشّیت و پدا گیپت و ڈَبِّشَ کنت بله یَکّ کپۆدرے که نامی دیدار اِنت، مُدام که چه ڈبّا درَ کئیت، تَچکا رئوت دیولۓ سَرا نِندیت و چَم و چَمّ اِنت که بال بکنت و جَمۓ درَچک دُناۓ سَبز و سارت ساهِگتِرێن درَچک اِنت. اِشیۓ بَزێن شاهَڑانی سَرا نِندگا آییا اَنچێن تاهیرے رسیت که آییا چه اِد و پێسر نمارِتگ.
رَمزان هر رۆچ تَچ و تاگا اِنت، شۆهازا اِنت. درُستێن مُرگانَ گیپت و ڈَبّا کنت بله دیدار گار اِنت. دیدارۓ هئیالا اے ڈبّ په آییا جَهندَمێن زِندانے. آییۓ دلا لۆٹِت اے ڈَبّ و ڈَبّۓ واهُندا آییۓ چَمّ مکَپتێننت. اے نێماگا رَمزان جئوَڑَگ و دوا و پُسپار کَنگا اَت که اے دیدارناما منا دِلسیاه کُرتگ. هر رۆچ همے شومّ و شانزدهَ گار اِنت. تئوامێن مُرگ همدا اَنت بله اے گِندگَ نبیت. منی وَه کار و رۆزگاری بُرتگ. تان دێرا شۆهاز کنگا رند، رَمزانا دیست که جمۓ سرا دیدار گۆن مێزَرا سُنٹ په سُنٹ اِنت و نِشتگ. رَمزانا تئوار کُرت: "دیدار!" بله دیدار بێسَما اَت. آییا نزانت که گوات کَئیی مَچّان اِنت. رَمزان لَبَجگا اَت. "هئو. تئیی کِردار بِزان همِش اِنت. تئو مرۆچی منی دستا بکَپ، پدا نگوَشۓ که منَ رئوان جَمۓ جَمکا نِندان و تَرا تینّ دِلا دئیان."
اناگت مێزَرا رَمزان سَما کُرت و دیدار هال دات که اۆدا بچار، رَمزان ترا شۆهازگا اِنت. دیدارا که رَمزان دیست، جێڑِتی: "من گِندۓ مێزَرۓ چمّانی تها جاگه بکُرتێن، چۆن شَرّ اَت" و مێزَرا همے دمانا وتی چمّ بند کُرتنت و گۆن دیدارا گوَشت: "دیدار! اے مرد وَه ترا اِدا نِندگَ نئیلیت. تئو نگوَشۓ منا چَلَّهے بکنۓ و وتی پادا بکنۓ"
همینچُکا رَمزان جَمۓ سرا بالا بوتگ اَت و دیداری گِپت و بُرت په ڈَبّا.
مێزَر سُهبا ماهَلَّه چه جَما اێر کَپت ے دیوالۓ سرا نِشت. وهد گوَزان بوت. نێمرۆچ آتک. بله مێزَر انگت اَبێتک اَبێتک اَت و جێڑَگا اَت که مرۆچی گوَشۓ رۆچ گَرمتِر اِنت. کمّے دلگۆشی کُرت. گوات وَه کشَّگا اِنت بله پرچا منا نلگّیت؟ و په گواتی کۆلێۓ شۆهازا آییۓ چَمّ په سِمِٹّۓ ڈَبّا کَپتنت. آییا هئیال کُرت گِندۓ اگن اَنّون اے ڈَبّ پچ کنگ ببیت، گواتۓ در پَچ بیت و مۆسُم وتی نۆکێن گُدان گوَرا کنت. بله ڈَبّ پَچّ نبوت تانکه مگربا مێزَرۓ ماتا مێزَر تئوار کُرت و جَمأ سرا بُرت. مێزَرۓ مۆسُم تانکه چار رۆچا یَکّ هساب چۆ تینّا تَپتگ اَت. پَنچُمی رۆچا رَمزانا ڈَبّ گۆن اے جَزما پچ کُرت و مُرگ ڈنّا کَشِّتنت که نون دیدارا جَمۓ سَرا رئوگۓ سِزا رَسِتگ. نون الّم اِبرَتَ گیپت و آ نێمگا نچاریت.
چارێن رۆچانی اَرواه گرادێن ودارا رند مرۆچی مێزَر و دیدارأ مۆسُم بدَل بوتگ اَت. کئوش زِرأ نمبان چۆ مِسکا شَنزان اَت. و اے دوێن سئوَڑَگ کنگا اَتنت که اگَن اے بهِشتێن مۆسُم ابَدمان کنگی اِنت. گُڑّا مارا چه مگرِبا و چه رَمزانأ آیگا پێسر هَلک رێچگی و چه اِدا لِکّگی اِنت. رۆچ زمینۓ سرۓ بانا درَتکگ اَت. زمین ا آسمانۓ نیاما ابێد رُژنا دِگه هِچّ نێست اَت. بسّ دور نێم
رۆچ زمینۓ سرۓ بانا درَتکگ اَت. زمین ا آسمانۓ نیاما ابێد رُژنا دِگه هِچّ نێست اَت. بسّ دور نێم آسمانا مێزَر و دیدار دو کَسانێن ٹِکّۓ وَڑا بال اَتنت و چمِّش زمینا اَتنت په اَنچێن هَنکێنێۓ شۆهازا که اۆدا وتی بهِشتا اێر کُرت بکَننت.
چاپ و شنگ: مۆمن، منیر (2016). لیلان.
منتوار: گۆشان نکپتگێن تئوار
