ولادیمیر گریگورویچ سوتیوا
رجانک: کریم بلوچ
گوَشتَ کنێن که چه ڈَنّی زبانان لبزانکی رجانک مان بلۆچیا نبئیگئے هسابا اِنت. کسه ' کــُـمـبــی و شیلانچـُـک ءِ چیرا' ــولادیمیر گریگورویچ سوتیوا، کریم بلۆچئے یک کۆشستے که ڈَنّی لبزانکا بلۆچ استمانئے نیاما بپَجّارێنیت..
موریک ءَ یکبرے سَکـّـیں هَئورئ مانترینت.
کجا وتا چیر بدنت ؟
موریک تچکیں ڈگار ءَ کسانیں شیلانچک بزاں کمبی یے دیست . جست و وتی رسینت شیلانچک ءِ بُل و کلاه ءِ چیرا وتی چیر دات .
شیلانچک ءِ چیرا نشتگ ات ؛ و هَئور زراب دیان ات
هَئور ءِ زراب گیش و گیش بیان ات ...
لیچک و لیهڑیں پرونکے ( مُلاؤکے ) ، وتا زبریناں تاں کمبی ءَ ، سر کت : _ موریک اَؤ موریک ، منا شیلانچک ءِ چیرا بهلّ ! _ من تــَرّ و لیهڑ بوته اوں ، بال کت نکناں !
_ من ترا کجا بهلاں ؟ _ موریک گوئشت . _ من تهنا وتا په هزار شِرّی اداں جه داته .
_ پرواهے نهنت ، یک کمے جه کم بیت ، بلے تئی ازت ودیت و گیش بیت .
موریک ، پرونک ءَ کمبی ءِ چیرا هِشت .
هئور هنگت تیزتر بوت ...
چه هموداں مُشکے هم تچاں و گوئزان ات . گوئشتی : _ منا هم کمبی ءِ چیرا بلیت ، من هنچو تر بوته اوں که چه من جوگے تچگ انت !
_ کجا ما ترا بهلیں ؟ اداں وا هچ جاگه نیست .
_ یک کمے نزیکتر و هورتر نند اوں ! یک کمے نزیکتر و هورتر نشت ( نست ) انت و مُشک اش هم شیلانچک ءِ چیرا هِشت .
هئور هنچو رچان ات که بند بیگ ءِ نامی نزانت ...
کمبی ءِ پهنات ءَ جنگے ( جنجشکے ) سِـٹـاں و گویواں یهت و گوئشتی : _ منی پـُـٹـاں تر و بانزلاں ژند بوتگ انت ! بهلیت که شیلانچک ءِ چیرا منی پٹ کمے هشک ببنت و من دمے آرام بکناں .
هَئور وا رچگ انت ! _ اداں وا جه نیست . _ دزبندی کناں کمے بکنزیت ! _ جوان انت . کمے کنزت انت _ و جنجشک ءَ هم جاه بوت .
همدان ات که کرگوشکے چه کجا تچاں یهت ، شیلانچکی دیست .
گوانکی جت : _ چیر دئیت منا ، منا برکینیت ، روباهے منی رندا کپته ! ...
_ بیچارگیں کرگوشک ، _ موریک گوئشت . _ بیاییت کمے نزیکتر نند اوں .
کرگوشک اش نوکی چیر داتک ات که روباه رَست .
_ کرگوشک اش ندیست ؟ _ سوجی کرت .
_ نه ندیستگیں .
روباه نزیکتر یهت و بویی چت و گوئشتی : _ هَمداں جاهے چیر نبوتگ ؟
_ آئی اداں کجا چیر ءَ بیت !
روباه وتی دُمب ءَ سُرینت و چه اوداں شـُت .
همے وهد هئور هم بند بوت _ رو ( روچ - روز ) هم درکپت . پهک چه کمبی ءِ چیرا در کپت انت و وَش و گـَل اتنت .
موریک پگری کت و گوئشتی : _ چون چو بوت کنت ؟ اول منی جند ءَ کمبی ءِ چیر ءَ جوانی ءَ جاه ءَ نبوت ، بلے هنوں ما پَنچیناں اوداں جاه هست ات !
_ کوا- ها - ها ! کوا - ها - ها _ ! کسے کند ات .
پهکاں چارست : کمبی ءِ سَرَگ ءِ سرا پُگل نِست ات و کندگ ( هَندگ ) ات : _ هــَؤ ، شما ! کــُمـبـی وا ...
وتی گپی نکٹینت و سٹی کت و شت .
پهکاں کمبی ءَ چارست و سرپد بوت انت که پرچے ( پرچا ) اولسر ءَ یکے ءَ جوانی ءَ جه نبوتگ و پدا په پنچیناں جه ودی بوتگ .
باریں شما سرپد بوته ایت ؟
