نبیسۆک: بالاچ بلوچ
بلوچستان یک انچیں زمینے کہ مدام نگیگیں جاورانی تہا انت چہ ھزاراں سالانی آسراتیانی بوگءَابید ، ہما زمین آ آماچی ءُ بدھالی ءِ آماچ انت
بلوچستانءِمردمانی زند نگیگیں جاورانی تہا انت ۔ آ چہ زندءِبنّکی آسراتیاں زبھر اَنت چشکہ نگنءُآپ۔زھگانی وانگ یک مزنیں لوٹے پہ اودءِجاہ مننداں۔ اے وڑیں جاوراں مردم آزمانءَچار انت ءُ نہ دیستگیں کمّکے ءِ ودارءَکن انت بلئے آزمان ام اے زمینءَگوں نا رزا انت ۔ مدامی وڑءَ اے آزمان وتی کھراں ہمے کڈّکءُچمبئی آنی سرءَریچیت کہ تہنا آوانی انت۔ سیلاب نازرکاں گیش تاوان دنت
بلئے کئے میار بار کنگ بہ بیت؟آزمان کہ برے ڈکاّل ءُ برے سیلابے کاریت ۔ یا ھما ھاکم کہ آوان اے زمین ہمے وڑءَکتگ کہ آزمانءَہر چی بیت اے زمینءِسرءَتاوانے بیت
بلوچستان چہ گواجن ءُ آپءَ پُرّیں سرزمنیے ، اے گوں مزنیں ساوڑےءَبندوک انت بلئے بدبھتی اے گواجن یا کارمرز کنگ نہ بنت اگاں بنت گڈءَدگرانی کیسگانی واستہ بنت ءُ بلوچستان ءَ بنیاتی آسراتی نیست ءُ مردم گژنءُواریءِآماچ انت ہمے واستہ چہ برزءِھستیاں چیزے کہ ادءَکئیت گڈءَادءَزوال بیت
ھورءُسیلاب ابرمی انت ماں کُلّیں جہانءَبنت بلئے دگنیاءِسک کم جاگہءَاے ھور مردماں بے لوگ ءُ جاہ کنت ۔ دگنیاءِدگے کنڈاں آواں ھداءِداتگیں اے ٹیکی پہ مردمانی نپءَکارمرز کتگ۔ ھور پہ کشتءُکشارءَکارمرز بیت نئیکہ ایشانی نکسان دیگءَ۔
بلوچستانءَھمک سیلابءَپد ، ہما کسّہ بندات کنگ بیت ھیرات ءُھکومتی مدتءُکمکّانی رنگءَبلئے اے جیڑھانی بنیاتی گیشواریءِنیمگءَنہ رَونت۔ ءُ گڈیءَہچ نہ بیت بس ادءِمردمانی ننگ لگتمال کنگ بیت
راستی ایش انت کہ بلوچستانءَکسّی دست سمارگءُ دلدوستیانی زلورت نہ انت کہ ہماسیاستدان کنگءَانت ۔اے ھاکمانی ذمہ واری انت کہ آ اے زمین ءِ گواجناں شرّیں وڑےءَکارمرز بکن انت دانکہ ھور تاوان مہ دنت ۔ ھور پہ اے زمین ءَ یک میراثے بیت ءُ ادءِنندوک چہ آزمانءِجمبراں پدءَنہ تُرس اَنت