نبشتکار: انیلا یوسف
جنئین ءَ چہ پل،وشبوءُ رنگءَ بہ گرداں زندگی ءِ سپر ءَ سربوگ ءَ بازیں جنئین وتی نُگرھیں جان ندر کُتگ انت۔ وانگ ءَ گِر داں کار ءِ اجازت، لوگ ءُ جاہ ءِ تہ ءَ بھر، سوہن ءِ دیگ ،زھگانی وانگ،منی جان منی واھشت ءُ نوں حجاب کنگ ءُ نہ کنگ ءِ پیسلہ ئِے تہءَ بازیں پندے بُر اّتگ۔ اے مردانی چاگرد ءَ ساہ ءِ زورگ ءَ بہ گِر داں جنئین ءَ مردانی جوڑ کتگیں اے چاگرد ءَ وتی ھکّ ءُ اُبال زہرشانی ءَ پد رستگ اَنت
ایندگہ راجانی وڑا بلوچ ءِ چاگرد ءِ تہءَ مرد ءِ وتواجھی انچو سر ءَ بار انت کہ کسّے ءَ هم ساہ زورگ ءِ اجازت نیست۔ لوگ ءِ جنئین بہ گرداں روزنی رد ءَ آزاتیں جنئین درست اے راھبندانی دیم ءَ بے وس ءُ مرگ ءِ دیمپان بوگ ءَ گندگ ءَ کاینت۔
گیشتر جنئینانی کشندہ آیانی وتی وتیگ اَنت جنئین ءُ گھار ءِ دست ءِ زرّانی وروک هم آیانی سر ءَ زور کنگ ،ایردست دارگ ءِ جھد ءَ انت برے نامے ءِ سر ءَ ،برے مھر ءِ نام ءَ، برے چاگردی رسم ءُ دودانی سوب ءَ، برے زھگانی وانگ ءُ اگاں اے درستیں چیز بے سوب بہ بنت گڈا مرگءِ دیمپان کنگ بہ بیت
جنئین شائری ءِ پل ءُ وشبو ءِ شبینے نہ انت ءُ نئیکہ نبشتہ کارے ءِ گدارے ءِ پاکیں کردارے۔ آ تہنا یک انسانے ءُ آئی ءَ وتی پُچ ءُ پوشاک، وتی زندگی ءُ ھمراہ ءِ گچین کنگ ءِ ھکّ بہ بیت ۔پاکستان ءِ تہ ءَ جنئین آجوئی زرمبش، جنئینانی کوش ءِ ھلاپ ءَ زہرشانی، افغانستان ءِ تہءَ جنکّانی وانگ ءِ ھلاپ ءَ آواز چست کنگ ءُ ایران ءَ حجاب ءِ ھلاپ و آجوئی زرمبش ءَ گہگیری اے چیزانی شاھد انت کہ جنئین نوں هیردست نہ بیت ءُ ھاموش نہ بیت اے جنز گوں تُرندی ءُ گہبودی ءَ دیم ءَ جنزان کنت.
