روس ءِ گیدی آزمانک
گوَشتَ کنێن که چه ڈَنّی زبانان لبزانکی رجانک مان بلۆچیا نبئیگئے هسابا اِنت. ماشا ءُ ناکو ممّ رۆسی گیدی آزمانک یک کۆشستے که ڈَنّی لبزانکا بلۆچ استمانئے نیاما بپَجّارێنیت..
هست ات يك پيرمرد و پيرزالے كه آهان ءَ نواسگے هست ات . نواسگ ءِ نام “ماشا ” ات . يك برے آئی ءِ دَزگهاراں يك جاه بيت انت و جنگل ءَ په كـُمبی و كـَاوَك ءِ چـِنـَـگ ءَ ، رَوَگ اتنت .آتك انت و لوٹت اش كه ” ماشا ” ی ءَ هم وتی پَجّی و همراه ءَ به بَر انت .
_ منی پيرُك ، منی بَـلـّـُك __ ماشا توار كت __ من ءَ موكـَل و اجازت انت كه وتی دَزگهارانی پَجّی ءَ ، جنگل و لـَد ءَ به رواں !؟
پيرك و بلك دوئيں جواب دات كہ : _ به رو ، بلے بچار ، چه وتی دَزگهاراں جتا مه كـَـپ ئے ، اگں نه ، گار بئے !
جنكواں ، جنگل ءَ آتك انت ، كـُمبی ، گوش و كاوكانی چـِنـَـگ ءَ گلائيش بيت انت .ماشلـُـك ، چه يك درچك بنے ءَ – دگه درچك بُنے ءَ ، چه يك جـَرّے ءِ كـَش ءَ _ دگه جـَـرّے ءِ كـَش ءَ ، كمبی ، گوش و كاوكانی چنگ ءَ روان بيت .و چو چه وتی دزگهاراں سست و گِستا بيت . پدا كوكار كـَشّاں و گوانك جناں بيت ، ے دَزگهاراں كسے نه اشكت و ے جواب نه دات
ماشـَلـُـك ، لد و جنگل ءَ روان بيت ، چـَـٹ گار بيتگ ات . آ ، رَست هَنچين جاهے كه درچكاں باز بـَز اتنت و آرام ات . چارت ئی __ گند ايت كه لـَٹـی لوگے جـَـكتگ . دروازگ ئی ٹـُكينت ، بلے كس جواب نه دات .دروازگ ئی تهلانك _ مهلانك _ دات ، دروازگ پَچ بيت . ماشلك ، مان بيت .تاگ ءِ كـَش ءَ ، چارپادگے ءَ نشت . نشت و پگر ءَ شت : « اے كئی كـُڈ و لوگ انت ؟ پرچا هچ كس گندگ نه بيت ؟…»
اے مَـزَنيں مـَمے ءِ لوگ ات ، تهنا اے وهداں لوگ ءَ نه ات ؛ و جنگل ءَ په تـَرّ و گرد ءَ شتگ ات . بيگاه و ديگر ءَ ، مم لوگ ءَ واتر بيت و ماشلك ئی ديست . وَش بيت ._ هَؤ ، _ گوئشت ئی _ نيں من ترا الس نه كناں و يله نه دَياں ! منی پَـجّی ءَ تو مان ئے . تو ترون ءَ روك كن ئے ، موشان گراد ئے ، من ءَ موش و بَـٹـاں وارين ئے .
ماشا هرچی كه وس كت كه روگ ءَ بليت ئی ، بلے مم نه منََّ ات و رَوَگ ءَ نه هشت ئی . نون هچ كار ئی كت نه كت . نوں ماشا گوں مم ءَ ، مم ءِ لوگ ءَ مَنت و پَشت كـَپت . مم سرجميں روچ ءَ لد و جنگل ءَ شت و ماشلك ئی گوئشت كه بے آئی ءِ اجازت و گوئشگ ءَ هچ چه لوگ ءَ در مه كپ ايت .
_ و اگں تو بروئے __مم گوئشت __هر داب بيتگ من ترا ودی كناں و گڑاں گراں و وراں !
ماشلك پگر كناں بيت كه چون چه مم ءِ كش ءَ به تَچ ايت . چَپ و چاگرد سرجم لد و جنگل انت ؛ كجام نيمگ ءَ به روت ؛ نزانت ئی و كسے نيست ات كه چه آئيا پول و جُست به كنت آ ، پگر كنان بيت ، پگر كنان بيت و پگر ئی كت . مم چه جنگل ءَ واتر ات . ماشلك ، مم ءَ گوئشت :
_ مم _ او مم ، من ءَ بل كه يك روچے برواں وتی كلگ و شهرك ءَ ، من پر وتی بلك و پيرك ءَ يك چيزے ٹيكی بران .
_ نه _ مم گوئشت _ تو جنگل ءَ گار بئے . بدئے وتی ٹيكياں كه من وت براں و سر اش كناں !
و ماشلك ءَ همے پكار ات ! آ ، چـِلْبـِـك و بسكوٹاں پَكتگ اتنت . گڑاں مَزنيں كـَتلے ئی ودی كت و مم ئی گوئشت :
_ ايش انت بچار ؛ من اے كتل ءَ بسكوٹ و چلبك مان كناں ، تو به زور و به بَرِ اش پر منی پيرك و منی بلك ءَ . هـَؤ بچار ، كـَتل ءَ راه ءَ پَچ مه كنۓ . بچار كه بسكوٹ و چلبكاں ، راه ءَ مه زور ئے و مه ورئے . من بيد ءِ درچك ءَ سركپاں ، و راه ءَ ترا چاراں !
_ جوان انت _ مم جواب دات _ كـَـتِل ءَ من ءَ بد ئے !
ماشلك گوئشت : _ دَمانے تو برو درا و به چار كه بارين _ زانان _ هَؤر گواريت يا نه !
هنچو كه مم چه لوگ ءَ در كپت ، ماشلك ، كتل ءَ مان بيت و بسكوٹ و چلبكان ءِ تَشت ئی وتی سرا اير كت انت . مم بـِر گشت ، ديست ئی كه كتل تيار انت ، زرت و پُشت ءَ كت ئی و ديم په كلگ ءَ ، رهادگ بيت . مم چه سَؤل و كـَنارانی درچكانی شَم و نيام ءَ روان بيت، چه يك كسانيں شيلے ءَ جهلاد و پدا چه يك برزگے ءَ سر كپت و شُت و شُت تا كه منتَگ و ژند بيت . درچكے ءِ بُنڈے ءَ نشت و گوئشت ئی :
_ نندان من بنڈے ءَ
وران چـِـلْـبـِك ءِ چـُـنڈے ءَ !
و ماشلك چه كتل ءَ گوئشاں بيت :
_ گنداں من ، من گنداں !
تو مه نند سرزُنڈاں
چلبكاں تو مه ور
په پيرك اش تو به بَر
په بلك اش تو كن سر !
_ هوم ، چونيں تيز گنديں چم ئی هست انت ، هرچيز ءَ گند ايت . مم وتا را گوئشت . گڑاں كتل ئی زرت ، پشتا كت و ديما روان بيت . شت و شت _ شت و شت ؛ آهر ءَ يك جاهے ءَ اوشتات و پدا نشت و گوئشت ئی :
_ ننداں من بنڈے ءَ
وران چلبك ءِ چنڈے ءَ ! ............
مم هيران و هبكه بيت : _ اوه كه چونيں زانوگرے ! درچك ءِ برزتريں ٹال _ شاهڈ _ ءَ شتگ و نشتگ ، و دور دوراں گندگ انت ! پاد آتك و پدا تيزی ءَ روان بيت . آتك و كلّگ ءَ مان بيت ، لوگ ئی ودی كت . بلك و پيرك ءِ لوگ ءِ دروازگ ئی باز گون زور كـُٹت و ٹكينت .
_ ٹك _ ٹك _ ٹك … ! پاچ ئی كن ات ، زوت ئی پاچ كن ات ؛ من پر شما چه ماشلك ءِ نيمگ ءَ ، ٹيكی آرتگ انت …
پيرك كتل ءِ دروازگ ءَ پچ كت ، چارت ئی و وتی چمديست ئی هم باور نه بيتگ ات : كتل ءَ مئی ماشلك انت كه نشتگ . زندگ ، جوڑ و دراه انت . هو ، بلك ، پيرك و ماشلك پهك گل بيت انت . پيرك و بلك ، ماشلك ءَ امبازاں زرت ، پَكت و چكت اش و په زانتكاری و زانت ءَ شاباش اش گوئشت
پيرك كتل ءِ دروازگ ءَ پچ كت ، چارت ئی و وتی چمديست ئی هم باور نه بيتگ ات : كتل ءَ مئی ماشلك انت كه نشتگ . زندگ ، جوڑ و دراه انت . هو ، بلك ، پيرك و ماشلك پهك گل بيت انت . پيرك و بلك ، ماشلك ءَ امبازاں زرت ، پَكت و چكت اش و په زانتكاری و زانت ءَ شاباش اش گوئشت
